Deel XVIII
Kroam

De kinger lofe d’r jank eri. ’t Is hu d’r letste sjoeëldaag vuur de krisvakans. D’r meester sjteet bij de duur van de klas.
‘Los d’r jas mar aa.’
De kinger kieke ziech aa. Ze sjnappe 't nit.
‘Woarum,’ vroagt ’t Aggie.
‘Dat zals te wal zieë.’
De duur van de klas sjteet óp. D’r Rob kiekt eri.
‘D’r adventskrans is voet.’
D’r meester sjtikt de erm in de loeët.
‘Da kanne vier de veerde keëts nit aasjtaeche.’
D’r Rob jeet de klas eri.
‘Woa is e da?’
‘Vier mósse ‘m zukke,’ zeët d’r meester.’Iech dink dat iech wees woa d’r adventskrans is.’
Heë pakt de jietaar van de moer en deed ze in ing jroeëse taesj.
‘Koom mar mit. Wen vier ze vinge, da kanne vier e nui sjtuks-je van ’t krismeersje zinge.’
’t Vesper leuft neëver d’r meester.
‘Iech jeleuf, dat d’r meester ‘m versjtaóche hat.’
D’r meester jrieëmelt ins. Heë zeët nuuks. Ze lofe e paar sjtroase durch. Noa d’r maat. Doa sjtunt kröam van d’r krismaat.
‘Wen vier d’r adventskrans urjens kanne vinge, da is ’t hei toch,’ zeët d’r meester
‘Doahinge is d’r kroam va miene papa,’ ruft d’r Abdoel.
‘Losse vier doa ieëtsjt hin joa.’
‘Joa, meester.’
D’r Abdoel leuft vuuróp.
‘Papa, vier kome.’
D’r pap van d’r Abdoel winkt. D’r Abdoel sjneurt d’rhin.
‘Iech zien d’r adventskrans!’
De anger kinger zient ‘m noen óch. D’r pap van d’r Abdoel hat inne sjteer va riet in de heng.
‘Dem han iech vuur uuch jeflieët. D’r krissjteer. Bringt d’r vrid.’
’t Sara wiest.
‘Doa kunt mieng mam mit de oma.’
Ze laache en winke. De oma hat ing tuut in de heng.
‘De oma hat kuch-sjer vuur uuch jebakke,’ zeët de mam.
D’r meester pakt de jietaar oes de taesj.
‘Noen kanne vier ’t nui sjtuks-je zinge.’
D’r pap van d’r Abdoel en de oma van ’t Sara sjtaeche de veer keëtse aa. In d’r kroam klinkt de jietaar van d’r meester. De kinger zinge mit.

óp d’r maat doa sjtunt noen kröam
zörje vuur e kris-jeveul
moeziek lidjer engelklank
wits te wat iech zoeë jeer weul
zingt ing vrauw va hatse jeer
leefde óp de janse eëd

Abdoel’s papa flieët ing sjteer
kuchs-jer deelt de oma oes
wat ing vräud en wat ing sjpas
doarum is dis tsiet zoeë sjun
zoeë sjun, zoeë sjun, zoeë sjun vol krismesfes