Buchs-je

Óp de kas ligke ze nog. De buchs-jer oes de vunnef-en-zivvetsieg joare van ’t moeziekfes. D’r Wiel lekt ing hank dróp. Ing erinneroeng. Heë hat ’t nog mitjemaad. ’t Ieëtsjte fes. Tsezame zose ze in ’t ‘talud’ van de sjtroas noa de baan. D’r klinge Wielie mit zieng famillieë. Moeziekkapelle trókke verbij. Marsjkonkoer.
Heë pakt ’t buchs-je i jen heng. ‘Feestgids’, sjteet dróp. ‘1951. Prijs 50 cent.’ Heë bekiekt zich de bladzieë. Ziene pap hat de pónkte d’rbij jesjraeve. E tsiejare-benke va Ernst Casimir vilt droes. Mit ’t logo van ’t fes i nuuntsieg tswai-en-zessieg. D’r jeróch va doe sjtiegt nog óp.
In de loof va de joare hat ziech vöal je-enderd. ’t Buchs-je va doe is noen e bóch woeëde. Ze zunt óch dis joar d’rbij jeweë. ’t Bertie en d’r Wiel. Mit momente va wieëmód. D’r sjtabel is jewase in de tsiet. Wie hoeëg nog? Zieng hank raest nog effe dróp. Da junt ze werm in de kas. Nuuntsing-ee-en-vóftsieg boave dróp. D’r bejin is ‘m bijblaeve. Va noeëts mieë voet. Weëd va de tsiet. Drievend óp tuen.