Uvverleëve

D’r Oeësterhaas trukt zieng sjpoare durch ’t nase jraas. ’t Versjtaeche en zukke van aier. En doanoa ’t tietsje. D’r sjport van uvverleëve. Vuur de ónjeblutsjde. Zoeë is ’t deë Oeësterdaag óch óppen sjtroas. Rennere fietse durch de sjtroase. Vuur d’r ieëtsjte. Ier ze kome hant de kinger óppen sjtroas ‘HUP HUP’ jekniet en fietse jemoald. Wen  de auto’s  en motere verbij kome verbleecht d’r kniet. De kinger sjtunt óp d’r sjtoep. Zicher vuur de blutsje. Ze róffe en klatsje. De auto’s tute noa hön en de lu óp de motere winke.
De kinger jenisse d’r sjport. Van aier in d’r jaad. Óp de hoeke kniete. Winke en róffe. En wen de rennere kome sjpringe ze va vräud. D’r finale kanne ze óp d’r tillevies zieë. Weë jewint. Is ónjeblutsjd.
Zoeë verjeet d’r Oeësterzóndieg. ’t Is sjtil óppen sjtroas. I hoes weëd jetietsjt.
En mörje werm. Oane de rennere. Mit de aier van uvverleëve.