Vadderdaag

‘D’r opa is d’r papa van de mama.’
D’r klinge kiekt zieng mam mit jroeëse oge aa. Ze zunt óp bezuk vuur d’r vadderdaag. ’t Bertie en d’r Wiel hant ’t hoes oranje jetseerd. Vadderdaag in oranje kluur. ’t Hoes völt ziech. De famillieë kunt bijenee. Tsezame voesballe kieke. De klingkinger in oranje triekoots sjneure eri en eroes. In d’r jaad ritsele de veëntjer in d’r wink. Oranje lidjer klinke. D’r klinge deed mit in ‘lalalala’. Kunt van d’r sjoeës aaf va de mam. ’t Bertie hingt de tseechnoenge óp die ze vuur d’r vadderdaag hant jemaad. D’r klinge jieët d’r Wiel inne engel. Tsezame mit de mam jevauwe van oranje papier. D’r Wiel hilt ‘m in de loeët.
‘Heimit junt vier winne’.
‘Joa opa,’ róffe ze allenäu i koer.
D’r klinge kunt d’rhinger.
‘Opa,’ zeët e en kiekt noa zieng mam.
Jraad hat ’t jet nuits jehoeëd. Jet va pap klinkt durch opa.
De sjtiemoeng sjtiegt. ’t Fes waast i deep oranje. Tsezame hant ze jewonne. Zoeë junt ze noa heem. D’r Wiel deelt nog oranje klumpjer oes.
‘Dag opa.’
‘Dag pap.’
Ze duie ziech.
‘Mie kink’.