2016aprilV(laat u voorlezen!)

Könniksdaag

Dizze mörje hat 't Bertie bij ziene man de medalieë ópjesjtaoche. 't Is könniksdaag. Da junt ze dróp oes. Ze zunt ópjewase mit 't könnejinnefes en bevrijdingsdaag. Tswai vrij daag. De lu woare vroeë dat d'r krig verbij woar. E oranjefes. Dat zunt 't Bertie en d'r Wiel blieve viere.
Ze lierete ziech kenne in de bus. Jans jet daag noa de sjoeël in ing anger sjtad. Ze bekiekete ziech dökser. Mar jezaad woeët nuuks. Bis deë daag. Drissieg april. Óp de vuurroet van de bus woare links en reëts veëntjer jeplekt. Ee roeë wies blauw en ee oranje. Ze woare vrij van sjoeël, mar ze varete doch mit de bus noa de sjtad. Doa woar jet los. In d'r beatkelder dansete ze óp moeziek van de Beatles en The Stones. Bis óp ee moal 't lidje 'Land van Maas en Waal' klónk. D'r janse kelder woar ee sjpringfes. Ze zónge allenäu 't lidje mit. 't Bertie en d'r Wiel dansete teëjenee aa. Wat in de bus nit wool klappe, kank noen waal. Zoeë hant ze ziech vónge. Oranje bliet vuur hön ing bezóngere kluur.
Hu noa de sjtad va vruier. Mit de bus va noen. Oane veëntjer óp de vuurroet. D'r beatkelder is nit mieë. De sjoeël aafjebraoche. Óp ing moer hat inne jroeës 'Prince heerlijk' jesjraeve. D'r boave hingt oes ing vinster ing vaan. 'Koningsdag' sjteet dróp. 't Bertie en d'r Wiel lofe je-ermd d'rlangs. D'r Wiel zingt ing sjtroof oes 'Land van Maas en Waal'. 't Bertie duit ins teëje hem.
Noa d'r oranjemaat. Jidder zie eje fes.