2016aprilIV(laat u voorlezen!)

Rennere-sjwees

Inne van de zóndieje in d'r April is 't pries. D'r huevel weëd uvversjtreumd durch fietsvrung. Ze kome al vrug. Mit klapsjteultjer, vane en beer. Hei en doa in de wei inne camper. D'r ieëtsje barbecue sjwaamt. Vanoes zie tsimmer kiekt d'r kuunsler oes uvver 't land. E kluresjpel va jreun bis broen. I reëte sjtukker. Jeplógd. Koens va boere. D'r weëg inne pienzelsjtrich teëje d'r huevel eróp. Tusje weie durch. D'r kuunsler waad. Va hinge de vinster.  Waad óp de klure-tsiepele van de rennere. Dansend en sjtoekend eróp.
't Rennere-sjwees weëd ummer mieë inne computerprojram. Va sjponsore. 't Weëd jerechend. D'r zever va kampf druegt óp i tactiek. D'r klank va hiegende rennere versjtomd. Wöad vuur d'r diechter verbleeche. Rennerjesjiechte va vruier joare ónjeleëze.
De klure luete óp. De zon tusje pakke wólke. Va jries noa sjwats. D'r kuunsler moalt i zie tsimmer. Huet in ziechzelver 't zoeze van de reër. Viejeliengemoeziek klinkt. Va wieds d'r tak va helikoptervluejele. Auto's toete. Motore broeze.
D'r kuunsler lekt d'r pienzel neer. Sjud ziech inne wien i. Sjteet hinger de vinster. 't Jesjrai van de fietsvrung sjalt durch de roete. Inne tsietersjlaif tusje 't jreun. E menutesjpel.
Reëndrupe valle. De fietsvrung pakke i. D'r kuunsler sjildert werm. Moalt wieër. Werm e joar. Rennere verbij jevare. D'r huevel verlosse. I ziech sjtreumt de tsiet. De oer van 't jeveul. Die bliet.